سياسة الخصوصية

المواقع الجغرافية

معظم الوسيطات بيشتغلوا من بيوتهم، لهيك ما بنخزّن الموقع الدقيق أبداً: الإحداثي بينزاح ٣٠٠ إلى ٨٠٠ متر باتجاه عشوائي قبل ما ينحفظ، والنقطة الحقيقية ما بتوصل قاعدة البيانات إطلاقاً.

يعني ما في عمود ممكن يتسرّب ولا نسخة احتياطية فيها الموقع الحقيقي. والمسافات المعروضة محسوبة من النقطة المزاحة ومقرّبة، لأن المسافة الدقيقة المقروءة من عدة مواقع بتسمح باستنتاج الموقع الأصلي.

الصور

بننزع بيانات EXIF من كل صورة قبل التخزين، بدون استثناء. صور الموبايل بتحمل إحداثيات GPS، وصورة منتج متصوّرة ببيت وسيطة بتلغي كل قواعد إخفاء الموقع لو انحفظت كما هي.

أرقام الهواتف

رقمك ما بينعرض لحد ولا بينزل في أي صفحة. لو فعّلتي زر واتساب، الزر بيفتح واتساب لمشترية مسجّلة دخول بس، والرقم بيضل عند السيرفر — ما بيوصلها الرقم ولا بيقدر حدا يجمع الأرقام من برا.

الستوريات

لما زائرة مش مسجّلة دخول تشوف ستوري لأول مرة، المتصفح بيعمل رقم عشوائي وبيحفظه عنده بس، عشان يتذكّر أي ستوريات شافتها على هالجهاز — ما فيه اسم ولا رقم ولا أي إشي بيدل عليها، وما بيتبعت غير مع طلبات الستوري.

المحادثات

محادثاتك محفوظة على خوادمنا وما بتنعرض لحد غير أطرافها. فريق وسيطاتي بيقدر يفتح محادثة لما يوصله بلاغ عنها، أو لحل خلاف بين مشترية ووسيطة، أو لمنع احتيال — وكل فتح بينسجّل باسم الشخص اللي فتحها ووقتها، وما بيوصل للأطراف أي إشعار قراءة منه.

لما يراسلك فريق وسيطاتي، الرسالة بتوصلك بمحادثة عادية عليها شارة «فريق وسيطاتي». أي حساب ثاني بيحكي باسم المنصة بدون هالشارة مش منّا.

حذف الحساب

بتقدري تحذفي حسابك من الإعدادات. بنخفي اسمك ورقمك وبريدك وصورك عن الكل فوراً، من كل صفحات وسيطاتي ومن التطبيق. الصور ما بنحذفها: بنحتفظ فيها عنّا، وما بتنعرض لحدا على وسيطاتي — بس إذا حدا حفظ نسخة منها قبل، على جهازه أو بموقع ثاني، هاي النسخة مش بإيدنا. إيصالات الدفع اللي بعتيها بتضل عند فريق وسيطاتي بس، لأنها سجلّ المبالغ اللي وصلتنا. عدد التقييمات بيضل — لأن حذفه بيسمح لأي حدا يمسح سجلّه ويسجّل من جديد بنفس الرقم.